Bag-ong tuig na, bag-ong yugto napud sa atoang kinabuhi. Sa niaging tuig, maingun nako nga mao ang pinaka-best nga tuig sa tibuok nakong kinabuhi kay:

• mas nasabtan nako akoang sitwasyon.
• mas nailhan nako akoang kaugalingon.
• mas healthy & strong nako physically and mentally.
• natagaan na nako'g gugma akoang kaugalingon.
• natagaan na nako'g importansya akoang kaugalingon.
• nakatukod ko'g mas lig-on nga relasyon sa mga tawong gihigugma nako.
• daghan kaayo ko'g nakat-onan pinaagi sa pagsulat, pagbasa, pag-obserba og paminaw.

Sa nakita ninyo nga video, mao na akoang daan nga kaugalingon duha katuig na ang nilabay, kaugalingon nako nga akoa nang gipatay, mao na ang mga panahon nga:

• wala nako kaila sa akoang kaugalingon.
• permi magbug-at akoang dughan.
• nagpadala ko sa akoang mga emosyon.
• hapit ko nagpadaog sa akoang huna-huna.
• wala ko kabalo kung unsa akoang buhaton taga-adlaw.
• nalubong na nako akoang kaugalingon sa kasakit og kaguol.
• permi ko naga-ngisi para ipakita sa ubang tawo nga malipayon ko.
• dili na nako masabtan og dili na mao akoang mga gipanghuna-huna.
• gikapoy nako sa akoang kinabuhi nga ganahan nalang ko maglipay-lipay.

Magtan-aw ko sa akoang kaugalingon sauna dili ko katuo nga ako to nga hangtod karon makapangutana ra gihapon ko nga "Nganong naabot ko sa punto nga wala nako kaila sa akoang kaugalingon? Unsa kaha akoang mga gipanghuna-huna? Nganong naabot ko sa punto nga ganahan nako mamatay?"

Gikalimtan na nako akoang daan nga kaugalingon pero ang dili nako makalimtan kay ang usa ka rason nga nganong nagpadayun ko sa kinabuhi, nga nganong mo bangon ra gihapon ko taga-adlaw, rason nga dili nako kayang pasakitan ang mga tawong duol sa akoang kasing-kasing.

Mangayo ko'g dakong pasaylo sa mga tawong akoang napasakitan sa akoang mga desisyon nga gihuna-huna ra nako akoang kaugalingon og nagpadala rako sa akoang emosyon.

Dako kaayo ko'g pagpasalamat sa mga tawong nagpabilin nga wala ko nila gipangbiyaan nga bisan akoa na silang nabiyaan.

Dako kaayo ko'g pagpasalamat sa mga tawong gikuyogan ko sa mga panahon nga kailangan ko og ka kuyog.

Sa akoang kaugalingon, dako kaayo ko'g pagpasalamat, paghimatas-on og paghanga kay wala ko nagpadaog sa akoang huna-huna og kung ikumpara ninyo akoang mga pictures sauna sa karon, naa nay nakitang dako nga kabag-ohan. Gihinay-hinay na nako og tarong akoang kaugalingon, gihinay-hinay na nako og disiplina akoang kaugalingon og nakagawas ko sa kalibutan nga gitawag nato og impyerno.

Makaguol huna-hunaon nga daghan kaayo'g tawo nga ginatago ra nila ilaang mga problema sa ilaang mga katawa og ngisi, nangita sila og naay maminaw pero walay andam nga maminaw, wala sila kabalo kung unsay buhaton og unsay solusyon sa ilaang mga problema maong ginalikayan ra nila pinaagi sa mga butang nga dili solusyon sa ilaang mga problema labi na sa bisyo. Makalimtan na dayun nila nga naa silay mga pangandoy nga ganahan makab-ot sa ilaang kinabuhi og malubong na dayun nila ilaang kaugalingon sa kasakit og kaguol.

Dili bugal-bugal ang depresyon, dili binuang ang depresyon, dili kataw-unon ang depresyon kay daghang kinabuhi ang nasayang bunga sa depresyon nga kamatayon ra ang ilaang nahuna-hunaang solusyon. Maong dili ta magpataka og istorya og mga daotan sa ubang tawo kay wala ta kabalo unsa ilaang gipang-agian. Ipakita nato ang paghigugma sa ubang tawo maskin dili nato kaila og labi na sa mga tawong gihigugma nato, kamustahon nato sila, isturyahon nato sila sa personal, paminawon nato kung unsa ilaang ganahan e-isturya og kuyogon nato sila sa atoang kabag-ohan.

Kung naay tawo nga duol sa atoang kinabuhi nga naa silay ganahan e-isturya, maminaw ta, kay sa pamaagi nga maminaw ta makagaan ta og dughan sa ubang tawo og mapabati nato sa iyaa ang importansya niya sa iyaang kaugalingon. Ayaw kabalaka nga wala ka kabalo kung unsay insakto nga itubag nimo kay kadaghanan sa mga tawong moistorya sa ilaang mga problema, ganahan ra nila nga naay mapagawsan og kabug-aton sa ilaang dughan og mag-amping ta sa atoang mga ipangtubag dili ta mo ingon nga "Okay ra na, mo labay ra na. Okay ra na, e-inom ra na." Wala ta kabalo kung unsay tinuod nga nabatian sa tawo, wala ta kabalo nga nakasamot na diay ta sa iyaang sitwasyon kay kung tinuod ta nga naghigugma, maminaw ta.

Ang kinabuhi puro kasakit og pag-antos, pero ganahan ba ta nga magpabilin? Maong atubangon nato atoang mga problema, dili sa ta magpasulabi sa atoang pagbisyo, atoang pag-inom og atoang pag-cellphone, tagaan sa nato og oras atoang kaugalingon para makahuna-huna og makapangutana kay ang tinuod nga isturya, walay laing tawo nga makasulbad sa atoang mga problema kung dili kita ra. Kadaghanan sa atoang mga problema kay wala man nato gipili pero nganong atoa pang dugangan?

Sugod karong tuiga og sa tibuok natong kinabuhi, maghinay-hinay nata og palayo sa mga tawong birahon ta paubos, mga tawong negatibo, mga tawong dili magpabati nato nga importante ta, mga tawong dili kabalo maminaw og mga tawong bakakon. Magsugod nata og plano sa atoang kinabuhi, magsugod nata og disiplina sa atoang kaugalingon, magsugod nata og tikang paabante padulong sa atoang mga pangandoy og magsugod nata og balos sa mga tawong tinuod nga naghigugma nato kay wala ta kabalo kung kanus-a ta o sila mawala aning kalibutana. Dili pa ulahi ang tanan para maghimo ta og kabag-ohan sa atoang kaugalingon, dili nato sayangan atoang mga potensyal og opportunidad sa atoang kinabuhi.

Sa niaging tuig og sa mga tuig nga nilabay, dili man mao ang best para sa atoang tanan pero hinaot unta karong tuiga mabuhi ta taga-adlaw nga mura ba og wala nay ugma nga walay sagol nga pagmahay. Malipayong bag-ong tuig para kanatong tanan.